Illa Reunión

 

 

Illa Reunión

CDG

Ana Vallés, logo do peche da Sala Galán, alíase co Centro Dramático Galego para poñer en escena un espectáculo no que se mesturan teatro, danza e música. Con esta montaxe, na que participan 14 intérpretes, ábrese a programación de produción propia do CDG.

Este proxecto artístico inaugural da nova etapa aberta no CDG indaga nas novas formas de expresión escénica e se desenvolve nos límites entre teatro, música e danza a partir do concepto da viaxe e as súas distintas interpretacións como pretexto.

Enmarcada no "Ciclo violeta" que deseñou a Consellería de Cultura e Deporte para este mes de marzo sobre a creación feminina en Galicia, a proposta escénica é exemplo "dunha cultura galega aberta ao mundo e á realidade."

Ana Vallés avanzou que o espectáculo utiliza a idea da viaxe e o mito do viaxeiro como pretexto para unha creación colectiva que funde os límites entre o teatro, a danza e a música e xoga co intercambio de cometidos entre o grupo de intérpretes, que actúan, bailan e tocan en directo distintos instrumentos.

Un elenco de 14 actores, bailaríns e músicos desenvolve unha intensa interpretación coral, que durante toda a obra se mantén nun plano paralelo ao das intervencións individuais. Nestas, os intérpretes comunican historias reais, propias e alleas, fundamentadas nos sentimentos contraditorios desatados por viaxes transcendentais nas súas vidas.

A acción desenvólvese nun espazo escénico diáfano, que concede gran protagonismo aos matices da luz deseñada por Baltasar Patiño e ao especial plano sonoro que aporta a música en directo dos instrumentos de vento (bombardino, trompeta, tuba) e de percusión que empregan músicos e actores.